Ou gen chwa sou fason ou ka enskri
Chak Eta ak teritwa fikse pwòp règ li sou enskrispyon pou vote. Ou gendwa kapab:
Tcheke si enskripsyon ou ajou
Asire w ou enskri ak non legal ak adrès ki kòrèk la sou wèbsayt Eta w lan. Anpil Eta egzije tou pou w enskri nan yon pati politik pou w ka vote nan eleksyon primè yo. Chwazi Eta oswa teritwa w pou konfime estati enskripsyon votè w lan sou wèbsayt eleksyon Eta w.
Enskripsyon w gendwa make “inaktif” si ou pa t vote nan omwen de (2) dènye eleksyon federal yo epi si ou pa t reponn lè ofisyèl eleksyon yo te eseye kontakte w. Biwo eta w oswa eleksyon lokal (an angle) ou an kapab ede w chanje estati enskripsyon w pou l revin aktif oswa yo ka reponn kesyon ou gendwa vle poze.
Fè chanje non ou sou enskripsyon votè w lan
Ou dwe mete ajou enskripsyon votè w lan onivo Eta oswa teritwa w lan apre ou fin fè chanje non legal ou. Chwazi Eta oswa teritwa w pou mete enfòmasyon w ajou.
Soumèt chanjman ou yo anvan dat limit enskripsyon pou Eta w lan. Dat limit enskripsyon pou Eta w kapab bonè, menm 30 jou anvan Jou Eleksyon an pou eleksyon lokal, Eta a oswa nasyonal. Eta w gendwa egzije pou w bay lisans chofè machin ou oswa kat idantite lè w ap enskri.
Chanje adrès ou sou enskripsyon votè w lan
Ou dwe aktyalize enskripsyon votè w lan apre yon chanjman dadrès, kit ou deplase rete andedan menm Eta a kit ou al rete nan yon lòt Eta. Si ou deplase ale nan yon lòt Eta, enskri nan Eta kote ou ye kounye a. Soumèt chanjman yo anvan dat limit enskripsyon Eta w lan, ki ka menm jiska 30 jou anvan Jou Eleksyon an.
Si ou pa gen tan pou enskri nan nouvo Eta w lan anvan eleksyon jeneral prezidansyèl la poutèt dat limit enskripsyon an fin pase, ansyen Eta kote ou te ye anvan an dwe otorize w pou w vote, swa avèk yon bilten vòt pa kourye lapòs oswa an pèsòn. Nan eleksyon ki pa prezidansyèI yo, Eta w gendwa otorize w pou ou vote. Apresa, ou dwe enskri nan nouvo Eta w lan.
Chwazi Eta oswa teritwa w pou mete enfòmasyon w ajou.
Vote pandan ou abite andeyò Etazini
Si w se yon sitwayen ameriken ki abite andeyò Etazini, ou ka enskri pou vote epi mande yon bilten vòt pou votè ann absans (pou vote pa kourye lapòs) lè w ranpli Aplikasyon pou Kat Postal Federal (an angle). Si ou manm lame Etazini oswa manm yon fanmi militè, ou kapab itilize tou Aplikasyon pou Kat Postal Federal la pou w ka enskri pou vote epi mande yon bilten vòt pou votè ann absans. Votè militè oswa ki aletranje kapab jwenn plis enfòmasyon nan Pwogram Federal Èd pou Vote (an angle).
Fè chanje afilyasyon pati politik
Lè ou enskri pou vote, sèten Eta ak teritwa gendwa mande ki afilyasyon pati politik ou. Nan Eta ak teritwa ki gen primè fèmen (an angle), ou kapab vote nan eleksyon primè pati w lan. Pou eleksyon jeneral yo, ou kapab vote pou nenpòt kandida, kèlkeswa afilyasyon pati w lan.
Seleksyone Eta oswa teritwa w lan pou chèche konnen kijan pou aktyalize afilyasyon pati w lan. Eta w lan gendwa mande pou w enskri yon lòt fwa ak nouvo afilyasyon w lan, ranpli yon fòm ki byen kout oswa bay opsyon pou chanje afilyasyon pati w lan an pèsòn nan yon biwo eleksyon lokal.
Chèche konnen dat limit enskripsyon yo
Pa gen okenn dat limit enskripsyon nasyonal votè. Nan sèten Eta, dènye jou pou enskri a se 30 jou anvan Jou Eleksyon an. Nan lòt Eta yo, ou kapab enskri Jou Eleksyon an. Jou Eleksyon se nenpòt eleksyon (eleksyon lokal, Eta oswa eleksyon nasyonal). Jwenn dat limit enskripsyon votè pou Eta w (an angle).
Kat enskripsyon votè w lan
Lè w fin enskri pou w vote oswa pou chanje enskripsyon w lan, yo gendwa voye yon kat enskripsyon votè ba w. Kat sa a konfime ou enskri epi ou pare pou w vote. Ou pa bezwen gen kat enskripsyon votè w lan sou w pou w ka vote, men ou dwe prezante yon pyès idantite. Chèche jwenn kijan ou ka resevwa yon kat enskripsyon votè sou wèbsayt eleksyon pou Eta w oswa lokal yo (an angle).
